People’s Organization Empowerment Program, isinagawa sa Daraga, Albay

Matagumpay na isinagawa ang People’s Organization Empowerment Program (ERPAT) na dinaluhan ng mga kawani ng Daraga Municipal Social Welfare and Development Office (MSWDO) noong ika-17 ng Setyembre 2024.

Ang nasabing programa ay isang mahalagang hakbang sa pagpapalakas ng kaalaman at kasanayan ng mga kawani sa pagtugon sa mga pangunahing isyung panlipunan. Tinalakay ng mga tagapagsanay ang mga sumusunod na paksa: RA 9262 o ang Batas Laban sa Karahasan sa mga Kababaihan at mga Bata, National Task Force to End Local Communist Armed Conflict (NTF-ELCAC), Community Anti-Terrorism Awareness (CATA), at ang Anti-Illegal Drugs Awareness Lecture.

Layunin ng aktibidad na tiyakin ang sapat na proteksyon para sa bawat babae at bata laban sa anumang uri ng karahasan sa pamamagitan ng pagbibigay ng kinakailangang kaalaman at kasangkapan para sa kanilang kaligtasan at kapakanan.

Kasama rito ang pagpapaliwanag ng mga pagsusumikap ng NTF-ELCAC sa paglutas ng mga ugat ng problema sa mga komunidad, upang magbigay ng mabisang solusyon at makapagtaguyod ng kapayapaan at kaunlaran sa mga lugar na apektado ng insurhensiya. Layunin din nitong itaas ang kamalayan ng bawat komunidad hinggil sa mga banta ng terorismo, bigyang-diin ang kahalagahan ng pagiging mapagmatyag upang mapanatili ang seguridad at kaayusan sa kanilang lugar, at palawakin ang kaalaman ng publiko tungkol sa masamang epekto ng ilegal na droga, hikayatin ang pag-iwas sa paggamit nito, at suportahan ang mga hakbang para sa rehabilitasyon at pag-iwas sa pag-abuso sa droga.

Ang matagumpay na pagsasagawa ng ERPAT sa Daraga ay nagbibigay ng mahalagang kontribusyon sa pagpapalakas ng kapasidad ng mga kawani ng MSWDO, na magagamit nila sa kanilang mga gawain para sa mas ligtas at mas maunlad na komunidad.