Mga Kabataan, nakilahok sa 18-Day Campaign on Violence Against Women

Aktibong nakilahok ang mga kabataan sa paggunita ng 18-Day Campaign on Violence Against Women (VAW), na ginanap sa pangunguna ng Local Government Unit ng Tublay sa panahon ng Flag Raising Ceremony noong Nobyembre 25, 2024.

Ang kampanya ay isinagawa sa ilalim ng temang “UNITED for a VAW-Free Philippines,” habang ang sub-tema ay nagbigay-diin sa kagyat na pangangailangan ng pagtatapos ng karahasan laban sa kababaihan: “VAW Bigyang Wakas, Ngayon na ang Oras!” Tampok sa kampanya ang panunumpa na pinangunahan ng mga miyembro ng Local Council Against Trafficking and Violence Against Women (LCAT-VAW) ng munisipalidad. Bukod dito, nag-organisa ang mga kabataan ng iba’t ibang aktibidad upang suportahan ang kampanya katuwang ang Tublay Municipal Police Station.

Mayroong mga VAWC Awareness Seminar at Zumba Dance Competition kung saan nagbahagi ang mga kabataan ng impormasyon tungkol sa kahalagahan ng pagrespeto at pagprotekta sa karapatan ng kababaihan.

Ang partisipasyon ng mga kabataan sa kampanya ay nagpapakita ng kanilang pakikiisa at dedikasyon sa paglaban sa karahasan.

Sa maliit na paraan, nagiging malaking hakbang ito tungo sa pagkakaroon ng isang lipunan na ligtas at malaya mula sa karahasan.

Pinuri ng mga lokal na opisyal ang aktibong partisipasyon ng mga kabataan at hinikayat ang pagpapatuloy ng ganitong mga inisyatiba upang mapanatiling ligtas at patas ang komunidad para sa lahat.

Sa pagtatapos ng pagdiriwang, malinaw na ipinakita ng mga kabataan ang kakayahan at determinasyon na maging bahagi ng pagbabago tungo sa isang mas makatarungan at mapayapang lipunan.