Inner Wheel Club at mga katuwang na grupo, nagsagawa ng Coastal Clean-up at Mangrove Planting sa San Fernando City, La Union
Ang Inner Wheel Club of La Union South, sa aktibong pamumuno ni Club President Dianne Ignacio Flores, kasama ang lahat ng Inner Wheel La Union Clubs at katuwang ang La Union Medical Society, Philippine College of Physicians (PCP) Northwestern La Union Chapter, at United Architects of the Philippines (UAP) – La Union Chapter, ay nagsama-sama para sa isang makabuluhang adbokasiya para sa kalikasan na isinagawa sa Carlatan, San Fernando City noong Agosto 24, 2025.
Itinuon ang mga gawain ng araw sa pangangalaga at pagpapanumbalik ng mga yamang-dagat, na sinimulan sa pamamagitan ng Coastal Clean-up Drive kung saan nagtulong-tulong ang mga kalahok sa pangangalap ng mga plastik at iba pang basura sa baybayin upang mapanatili ang kalinisan at ganda ng dalampasigan. Sinundan ito ng pagtatanim ng bakawan (Mangrove Planting), isang mahalagang hakbang upang mapalakas ang proteksiyon ng baybayin laban sa pagguho, at magsilbing tirahan ng mga lamang-dagat.
Upang higit pang mapalalim ang kaalaman ng komunidad, nagsagawa ng Edukasyonal na Sesyon tungkol sa kahalagahan ng mga bakawan, na nagbigay-diin sa kanilang mahalagang papel sa pangalaga ng biodiversity, pag-imbak ng carbon, at pagbawas ng panganib sa sakuna.
Kasunod nito ay isang talakayan tungkol sa kahalagahan ng wastong pamamahala ng basura at pagrerecycle, na pinangunahan ni G. Celso Jucutan, Co-Founder ng (LINK) “Lupon ng mga Indibidwal na Nangangalaga sa Kalikasan”. Tinalakay niya kung paano makatutulong ang mga napapanatiling gawain upang maprotektahan hindi lamang ang kalikasan kundi pati na rin ang kinabukasan ng mga susunod na henerasyon.
Ang sama-samang pagkilos na ito ay sumasalamin sa iisang layunin ng mga civic organizations, medical professionals, at community leaders para sa pangangalaga ng kalikasan. Alinsunod sa tema ng Inner Wheel na “Step Up & Lead by Example,” ipinakita ng proyektong ito na sa pamamagitan ng pagkakaisa at sama-samang pagkilos, posible ang napapanatiling pagbabago para sa kinabukasan.
Source: Inner Wheel Club of La Union South – D379
