RPSB Team, nakilahok sa community rice planting sa Hungduan, Ifugao

Nakilahok ang Revitalized Pulis Sa Barangay (RPSB) Team ng 1501st Mobile Company at 1st Ifugao Provincial Mobile Force Company sa isang community rice planting activity sa Barangay Baang, Hungduan, Ifugao noong Enero 21, 2026, bilang bahagi ng pagpapalakas ng ugnayan sa komunidad at pagsuporta sa kabuhayang pang-agrikultura ng lugar.

Pinagsama ng aktibidad ang mga tauhan ng Police Regional Office Cordillera Administrative Region (PRO CAR) at mga residente ng barangay sa aktuwal na pagtatanim ng palay sa mga lupang sakahan. Ang pagsasaka ng palay ay mahalagang bahagi ng kultura at ekonomiya ng Ifugao at mahigpit na kaugnay ng tanyag na rice terraces na pamana ng lalawigan.

Sa naturang gawain, nagtrabaho nang magkatuwang ang mga pulis at magsasaka, kung saan natutunan ng mga alagad ng batas ang tradisyunal na pamamaraan ng pagtatanim habang ipinapakita ang kanilang malasakit bilang hindi lamang tagapagpatupad ng kaayusan kundi bilang aktibong katuwang sa kaunlaran ng komunidad. Nagpahayag naman ng pasasalamat ang mga lokal na lider sa tulong ng kapulisan na nakatulong upang mapabilis ang gawain at mapalalim ang tiwala sa pagitan ng pamahalaan at mamamayan.

Binigyang-diin ng RPSB Team na ang kanilang presensya sa komunidad ay lampas sa pagpapanatili ng kapayapaan at kaayusan. Sa pamamagitan ng pakikilahok sa mga gawaing tulad ng rice planting, ipinapakita ng PNP ang taos-pusong suporta sa kabuhayan, kultura, at kapakanan ng mga mamamayan ng Ifugao, kasabay ng pagsusulong ng sama-samang adhikain para sa isang ligtas at maunlad na pamayanan.

Source: rmfb15 wolverines fb page