PNP at Hingyon Municipal Health Office, naitaguyod ang Heart Health Seminar para sa Ifugao Cops
Bilang bahagi ng pagdiriwang ng Hearts Month, nagsagawa ng Heart Health Seminar ang Ifugao Police Provincial Office (IPPO) sa pamumuno ni Provincial Director PCol Jeremias G. Oyawon noong Pebrero 10, 2026, sa Tanglaw-Lahi Conference Hall, Camp Col Joaquin P. Dunuan, Poblacion North, Lagawe, Ifugao. Layunin ng aktibidad na palakasin ang kamalayan ng kapulisan hinggil sa kahalagahan ng kalusugan ng puso bilang pundasyon ng epektibong serbisyo publiko.
Itinatampok sa seminar ang matibay na pakikipagtulungan ng IPPO at ng Municipal Health Office ng Hingyon, Ifugao, sa pamamagitan ng pangunahing tagapagsalita na si Dr. Jerameel B. Bahni, Municipal Health Officer. Tinalakay niya ang wastong pangangalaga sa puso, pagpapanatili ng malusog na pamumuhay, at mga hakbang sa pag-iwas sa mga sakit na may kaugnayan sa puso.
Sa kanyang talakayan, binigyang-diin ni Dr. Bahni na mahalaga ang balanseng pagkain, regular na ehersisyo, sapat na pahinga, at maayos na pamamahala ng stress, lalo na para sa mga alagad ng batas na humaharap sa mataas na antas ng pisikal at emosyonal na hamon sa kanilang trabaho. Aniya, ang isang malusog na kawani ay mas handa at mas epektibo sa pagtupad ng tungkulin sa komunidad.
Ang nasabing inisyatiba ay patunay ng patuloy na malasakit ng PNP, katuwang ang lokal na sektor ng kalusugan, sa kapakanan ng kanilang mga tauhan. Sa pamamagitan ng ganitong mga programa, pinagtitibay ng IPPO ang paniniwala na ang pangangalaga sa kalusugan ng kapulisan ay mahalagang hakbang sa pagbibigay ng ligtas, maaasahan, at makataong serbisyo sa mamamayan ng Ifugao.
Source: Ifugao PPO
