Ngiti at Pag-asa, Hatid ng 2nd Cagayan PMFC at mga katuwang na Sektor sa Agta Community sa Sta. Ana
Naghatid ng ngiti at pag-asa ang 2nd Cagayan Police Mobile Force Company (PMFC) matapos nitong matagumpay na maisagawa ang feeding at gift-giving activity para sa mga katutubong Agta sa isang liblib na komunidad sa Sta. Ana, Cagayan noong Marso 28, 2026.
Pinangunahan ng 4th Maneuver Platoon ng 2nd Cagayan PMFC ang naturang aktibidad sa ilalim ng pamumuno ni PCMS Christian Ralph Seguro, Platoon Senior PNCO. Naging katuwang nila ang 4H Club ng Sta. Ana na pinamumunuan ni Ms. Rochelle V. Rumbaoa, gayundin si Pastor Sander Silario ng Church of the Living God.
Ginanap ang programa sa Agta Community sa Sitio Turud, Barangay Marede, kung saan 25 pamilya ang nabigyan ng libreng pagkain at mga food pack. Agad na naramdaman ang kasiyahan at pasasalamat ng mga benepisyaryo na labis na naantig sa ipinakitang malasakit ng kapulisan at kanilang mga katuwang.
Ayon sa mga organizers, layunin ng aktibidad na hindi lamang magbigay ng agarang tulong kundi maghatid din ng saya at pag-asa sa mga pamilyang Agta na kabilang sa mga sektor na higit na nangangailangan ng suporta.
Bukod sa pamamahagi ng pagkain, nagsilbi rin ang programa bilang mahalagang pagkakataon upang mas mapalalim ang ugnayan sa pagitan ng kapulisan at ng komunidad. Itinuturing itong mahalagang hakbang sa pagsusulong ng kapayapaan at kaayusan sa nasabing lugar.
Ipinakita rin sa aktibidad ang kahalagahan ng pagtutulungan ng iba’t ibang sektor—mula sa kapulisan, mga organisasyon, at faith-based groups—upang makapaghatid ng makabuluhang serbisyo sa mga katutubong pamayanan.
Sa huli, patuloy ang panawagan ng mga katuwang na ahensya at organisasyon sa publiko na makiisa sa mga ganitong inisyatibo upang mas mapalawak pa ang mga programang nakatuon sa kapakanan at kaunlaran ng mga katutubong komunidad sa lalawigan.
Source: 2nd Cagayan PMFC
