Bayanihan sa Abulug, naghatid ng agarang tulong sa pamilyang nangangailangan
Muling ipinamalas ang tunay na diwa ng bayanihan sa bayan ng Abulug matapos magkaisa ang Municipal Advisory Group (MAG), PNP Abulug, at lokal na pamahalaan upang agarang matulungan ang isang pamilyang nangangailangan sa Brgy. Libertad noong Abril 6, 2026.
Sa ilalim ng pamumuno ni Hon. Mayor Marie Angelie Vargas, agad na kumilos ang mga miyembro ng MAG upang tugunan ang sitwasyon ng mag-asawang sina Jaygee Tiburcio Ignacio at Lhycel Arellano Ignacio na nasiraan ng kanilang tahanan.
Nagkaloob ng tulong si Ginoong Gilbert Chan, Vice President for External Affairs at may-ari ng Hilltop Hardware, sa pamamagitan ng pagbibigay ng mga plywood na magsisilbing pangunahing materyales sa agarang pagsasaayos ng kanilang bahay.
Ang kalagayan ng pamilya ay agad na iniulat nina Ginang Agnes Buizon, BHW at Kagawad Monching Guillermo, kapwa miyembro ng MAG, upang masiguro ang mabilis na aksyon at maibigay ang kinakailangang tulong.
Sa pangunguna ni PCpt John Jefferson A. Bumanglag, Officer-in-Charge ng Abulug Police Station, at sa pakikipagtulungan ng mga opisyal ng barangay, matagumpay na naihatid ang tulong sa pamilya na naging daan upang agad nilang masimulan ang pagkukumpuni ng kanilang tahanan.
Lubos ang naging pasasalamat ng mag-asawang Ignacio sa MAG, PNP, at sa mga opisyal ng barangay sa ipinakitang malasakit at mabilis na pagtugon sa kanilang pangangailangan.
Patunay ang insidenteng ito sa matibay na ugnayan at sama-samang pagkilos ng komunidad, kung saan ang bayanihan ay nananatiling buhay sa puso ng bawat mamamayan. Patuloy naman ang pagtutulungan ng MAG, PNP, at lokal na pamahalaan sa paghahatid ng maagap, epektibo, at makataong serbisyo para sa kapakanan ng publiko.
Source: Abulug PS Valley Cops
