Bayanihan ng PNP at Stakeholders, naghatid ng tulong sa mga magsasaka sa Sagada

Nagpakita ng tunay na diwa ng bayanihan ang magkatuwang na pagkilos ng Philippine National Police at iba’t ibang sektor ng komunidad sa isinagawang community outreach activity sa silangang bahagi ng Sagada. Sa pangunguna ng Sagada Municipal Police Station sa ilalim ng liderato ni PCpt Bonifacio P. Fanged, katuwang ang Saint Mary’s School Class 1994, Radyo Sagada 104.7 FM, mga BPAT, at mga pribadong indibidwal, matagumpay na naisakatuparan ang makabuluhang programa para sa mga lokal na magsasaka.

Layunin ng aktibidad na matulungan ang mga vegetable farmer na naapektuhan ng oversupply at mababang presyo ng gulay sa merkado. Sa pamamagitan ng sama-samang pagsisikap ng mga stakeholder, direktang binili ang mga inaning repolyo mula sa mga magsasaka upang mabigyan sila ng agarang tulong pinansyal at mabawasan ang kanilang pagkalugi.

Naging tampok sa programa ang malasakit at pagkakaisa ng iba’t ibang sektor ng lipunan. Magkatuwang na nagtrabaho ang mga pulis, volunteers, at partner organizations upang mapagaan ang dinaranas na hamon ng mga magsasaka, kasabay ng pagpapakita ng malasakit at suporta sa komunidad sa panahon ng krisis.

Bukod sa pagtulong sa mga magsasaka, ipinamahagi rin ang mga inaning gulay sa iba’t ibang barangay sa Sagada upang matiyak na makarating ang sariwa at masustansyang pagkain sa mga pamilyang nangangailangan. Nakatulong din ito upang maiwasan ang pag-aaksaya ng mga produktong agrikultural at higit pang mapalakas ang ugnayan ng kapulisan at mamamayan.

Patuloy namang isinusulong ng PNP at ng mga katuwang ang diwa ng volunteerism at community cooperation bilang patunay na sa pamamagitan ng sama-samang pagkilos, malasakit, at bayanihan, nagiging posible ang pagbangon at pag-asa para sa mga komunidad na nahaharap sa pagsubok.

Source: PNP Mt Province Sagada