Anti-Illegal Drugs Symposium isinagawa sa Tagum City National Comprehensive High School bilang bahagi ng NDEP

Aktibong lumahok at naging tagapakinig ang mga mag-aaral ng Tagum City National Comprehensive High School sa isinagawang Anti-Illegal Drugs Symposium noong Nobyembre 11, 2024.

Ang nasabing symposium ay pinangunahan ng mga tauhan ng Tagum City Police Station bilang bahagi ng patuloy na pagsisikap na makapagbigay ng edukasyon at kamalayan sa mga kabataan hinggil sa mga panganib at masamang epekto ng ilegal na droga.

Ang aktibidad ay naglalayong magsagawa ng masusing kampanya laban sa ilegal na droga, isang isyu na patuloy na nagdudulot ng malaking hamon sa lipunan.

Ang symposium ay tumalakay sa mga aspeto ng droga, mula sa mga uri ng ipinagbabawal na gamot, mga epekto nito sa kalusugan, at mga legal na konsekwensya ng paggamit at kalakalan nito.

Kasama rin sa layunin ng aktibidad na ito ang pagpapalakas ng mga programa at inisyatiba ng National Drug Education Program (NDEP) ng Department of Education (DepEd).

Sa pamamagitan ng ganitong mga symposium at aktibidad, layunin ng mga awtoridad na mas mapalakas ang partisipasyon ng mga kabataan sa mga programa ng gobyerno at maging mga aktibong kalahok sa mga hakbang upang labanan ang paglaganap ng ilegal na droga sa komunidad.