BPATs sa Sagay City, mas pinalakas sa malawakang pagsasanay para sa kapayapaan at kaayusan
Pinangunahan ng Sagay Component City Police Station sa pamumuno ni PLTCOL Alvimar M. Flores ang isang malawakang Skill Enhancement Training Seminar para sa mga miyembro ng Barangay Peacekeeping Action Teams (BPATs) na ginanap sa Barangay Puey, Sagay City nitong Oktubre 16, 2025.
Ang nasabing pagsasanay ay bahagi ng patuloy na programa ng lokal na pamahalaan at kapulisan na palakasin ang kakayahan at kahandaan ng mga BPATs bilang pangunahing katuwang ng kapulisan sa pagtugon sa mga suliraning pangkapayapaan at pangkaayusan sa komunidad.
Sa aktibidad na ito, masusing tinalakay at isinagawa ang iba’t ibang praktikal na sesyon gaya ng Self-Defense at Arresting Techniques na may layuning maiangat ang antas ng kanilang kahandaan sa mga sitwasyong maaaring mangailangan ng agarang interbensyon.
Bukod dito, kabilang din sa mga itinuro ang mga espesyal na module tulad ng Emergency Response para sa mabilis na aksyon sa oras ng sakuna, Dispute Management para sa epektibong pagtugon sa mga alitang pampamilya at pamayanan, Threat Identification sa mga paaralan upang maprotektahan ang kabataan, at Basic Safety at Child Protection bilang bahagi ng pagtiyak sa kaligtasan ng mga kabataan at kababaihan.
Ipinakilala rin ang kahalagahan at wastong paggamit ng Unified DIAL 911 bilang pambansang emergency hotline upang mapabilis ang pagresponde sa mga pangangailangang kritikal.
Bukod pa rito, nagbahagi ang mga tagapagsanay ng mahahalagang Crime Prevention Safety Tips na makatutulong sa mga BPATs na makaagap sa pag-iwas sa mga krimen at agarang makapagrerekomenda ng aksyon sa awtoridad.
Binigyang-diin din sa seminar ang kahalagahan ng pagiging alerto at mapagmatyag ng bawat miyembro ng BPATs, lalo na sa pag-monitor ng mga kahina-hinalang aktibidad sa kanilang nasasakupan, at ang pagsasabuhay ng mensaheng “See Something, Say Something” upang mapalawak ang kultura ng kooperasyon at pagbabantay sa paligid.
Higit pa rito, hinikayat ang publiko na makiisa at maging responsable sa pagbibigay-ulat sa kapulisan sa pamamagitan ng tamang paggamit ng DIAL 911 sa oras ng kagipitan.
Sa kabuuan, itinuturing na napakalaking tagumpay ang isinagawang pagsasanay dahil hindi lamang nito pinatibay ang kakayahan at moral ng mga BPATs, kundi lalo nitong pinagtibay ang ugnayan at tiwala ng komunidad sa kanilang mga tagapangalaga ng kapayapaan.
Patunay ito ng walang humpay na dedikasyon ng mga awtoridad ng Sagay City sa pagsusulong ng Serbisyong Mabilis, Tapat at Nararamdaman para sa ligtas at maunlad na pamayanan.
Source: NOCPO SAGAY CPS
