PRO 2, pinarangalan ng DA sa ika-10 anibersaryo ng DZDA FM

Pinuri at pinarangalan ng Department of Agriculture (DA) Regional Field Office 02 ang Regional Public Information Office ng Police Regional Office 2 (PRO 2) noong Pebrero 19, 2026, bilang pagkilala sa matatag nitong pakikipag-ugnayan sa larangan ng pampublikong impormasyon. Isinagawa ang parangal kasabay ng pagdiriwang ng ika-10 anibersaryo ng DZDA 105.3 MHz FM Radyo Pangkaunlaran, ang pangunahing himpilan ng agrikultural na impormasyon sa Cagayan Valley.

Sa pangunguna ng Regional Agriculture and Fisheries Information Section (RAFIS), ginanap ang selebrasyon sa ilalim ng temang, “DZDA FM Radyo Pangkaunlaran: Isang DA-kadang tinig ng magsasaka, tungo sa mas masaganang agrikultura at maunlad na ekonomiya.” Sa loob ng isang dekada, nagsilbi ang DZDA bilang mahalagang daluyan ng balita, kaalaman, at mga programa para sa mga magsasaka, mangingisda, at iba pang stakeholder sa rehiyon.

Bilang bahagi ng programa, idinaos ang isang espesyal na consultative meeting kasama ang mga katuwang na ahensya ng pamahalaan upang ipakita ang broadcast operations at mga umiiral na communication protocol ng DZDA. Tampok din ang isang awards ceremony bilang pagkilala sa mga ahensya at indibidwal na naging katuwang sa pagpapalakas ng programa ng istasyon at sa tuloy-tuloy na paghahatid ng mahahalagang balita sa sektor ng agrikultura.

Isang Pledge of Commitment ang nilagdaan sa nasabing okasyon, na muling nagpapatibay sa sama-samang adhikain para sa makatotohanan, responsable, at makataong komunikasyon. Layunin nitong higit pang paigtingin ang modernisasyon at industriyalisasyon ng sektor ng agrikultura sa rehiyon, sa pamamagitan ng mas maayos na pagpapalaganap ng impormasyon at koordinasyon ng mga ahensya.

Ayon sa DA, ang pagkilala sa PRO 2 ay patunay sa mahalagang papel ng interagency collaboration sa pagpapalakas ng lokal na komunidad ng mga magsasaka at sa pagsasakatuparan ng mga estratehikong layunin ng kagawaran. Dumalo sa programa sina PCol Alberto A. Calimag, Chief ng Regional Community Affairs and Development Division, at Sharon C. Mallillin, OIC ng Regional Public Information Office, bilang kinatawan ni PRO 2 Regional Director PBGen Antonio P. Marallag, Jr., kasama ang iba pang kawani ng RPIO.

Source: Police Regional Office 2