Motorcade, isinagawa Sa pagdiriwang ng anibersaryo ng New Corella TODA

Bilang bahagi ng pagdiriwang ng anibersaryo ng New Corella Tricycle Operators and Drivers Association (TODA) noong ika-4 ng Enero, 2025, isinagawa ang isang makulay at matagumpay na motorcade na naging sentro ng selebrasyon.

Ang motorcade ay hindi lamang isang simpleng parada kundi isang simbolo ng pagkakaisa at suporta para sa mga tricycle operators at drivers ng bayan ng New Corella.

Ang aktibidad ay nagbigay-daan upang ipakita ang pagmamalaki ng mga miyembro ng TODA at kontribusyon sa pag-unlad ng lokal na komunidad, pati na rin ang kanilang mahalagang papel sa pampasaherong transportasyon sa kanilang nasasakupan.

Sa nasabing motorcade, aktibong nakibahagi ang mga miyembro ng New Corella Civil Security Unit (CSU), na nagsagawa ng mga hakbang upang tiyakin ang kaligtasan ng lahat ng dumalo sa kaganapan gayundin ang New Corella Municipal Police Station.

Ang presensya ng mga lokal na awtoridad ay nakatulong upang mapanatili ang kaayusan, maiwasan ang anumang hindi inaasahang insidente, at tiyakin na ang kaganapan ay natuloy ng maayos at walang aberya.