PATUBIG Project at Outreach Program, Ipinagkaloob sa Paaralan sa Paracelis

Matagumpay na nai-turnover sa pamunuan ng Catubangan Primary School ang PATUBIG Project kasabay ng isang outreach program na isinagawa sa Brgy. Palitud, Paracelis, Mountain Province noong Marso 12, 2026. Pinangunahan ang aktibidad ng mga tauhan ng 2nd Mountain Province Provincial Mobile Force Company sa pakikipagtulungan ng mga guro mula sa Mountain Province State University at mga opisyal ng barangay.

Ang proyektong PATUBIG ay inilunsad matapos matukoy ng Regional Police Support Battalion team ng 2nd MPPMFC ang pangangailangan ng paaralan sa maayos at tuloy-tuloy na suplay ng tubig. Sa pamamagitan nito, inaasahang masusuportahan ang pang-araw-araw na gawain ng mga mag-aaral, guro, at ng buong komunidad ng paaralan.

Kasabay ng turnover ceremony ay nagsagawa rin ng outreach activity na kinabibilangan ng feeding program at pamamahagi ng hygiene kits at school supplies para sa mga mag-aaral. Ang inisyatiba ay pinangunahan ng mga guro mula sa MPSU–CCJE Paracelis na naglalayong magbigay-suporta at inspirasyon sa mga batang mag-aaral.

Bilang bahagi rin ng pagdiriwang ng National Women’s Month, nagbigay-pugay ang mga babaeng miyembro ng 2nd MPPMFC sa mga guro ng paaralan. Namahagi sila ng mga bulaklak, chalk, at erasers bilang simpleng simbolo ng pasasalamat sa dedikasyon ng mga guro, lalo na ng mga kababaihan, sa paghubog ng kinabukasan ng kabataan.

Ipinakita ng nasabing aktibidad ang matibay na ugnayan ng pulisya, mga guro, at ng komunidad sa paghahatid ng mahahalagang serbisyo sa mga barangay. Sa pamamagitan ng sama-samang pagkilos ng iba’t ibang sektor, patuloy na napalalakas ang mga programang nagtataguyod ng kaunlaran at mas maayos na kinabukasan para sa mga kabataan at pamayanan.

Source: PNP Dos Mt Province PMFC FB Page