Talakayan ukol sa Drug Awareness at mga Mahahalagang Batas, isinagawa sa Tanza, Cavite
Isang talakayan na may layuning magbigay-kaalaman sa mga kabataan ng Barangay Santol, Tanza, Cavite ang isinagawa ng Tanza Municipal Police Station, sa pamumuno ni PLtCol Al-Rieza S Kinang, Chief of Police, nito lamang ika-10 ng Agosto taong kasalukuyan sa Covered Court ng nasabing barangay.
Tampok sa aktibidad ang mga paksa tungkol sa pag-iwas sa ilegal na droga at pag-unawa sa ilang mahahalagang batas gaya ng Republic Act 8353 (Anti-Rape Law of 1997), Republic Act 11313 (Safe Spaces Act), at Executive Order No. 70 na naglalayong wakasan ang lokal na armadong tunggalian sa pamamagitan ng isang buo at pinagsama-samang pagtugon mula sa pamahalaan at mamamayan.
Ang mga kabataan ang pangunahing kalahok sa nasabing pagtitipon, kung saan ipinaliwanag ang mga epekto ng droga hindi lamang sa kalusugan kundi pati na rin sa kinabukasan ng isang indibidwal. Tinalakay rin ang kahalagahan ng respeto sa kapwa, ang mga karapatang dapat pangalagaan, at ang mga hakbang upang makaiwas sa karahasan at pagsangkot sa mga iligal na gawain.
Bukod sa pagbibigay impormasyon, layunin ng ganitong aktibidad na linangin ang kamalayan ng kabataan sa mga isyung panlipunan na direktang nakaaapekto sa kanilang pang-araw-araw na buhay. Ipinakita sa talakayan na mahalagang bahagi ang kabataan sa pagpapanatili ng isang maayos at ligtas na komunidad.
Ang programang ito ay patunay ng patuloy na pagsisikap ng iba’t ibang sektor ng lipunan na mapalakas ang edukasyon ukol sa batas at tamang asal, lalo na sa hanay ng kabataan.
Source: Tanza Pnp
