Triple Impact: JCI Rosales Padyak, Handog Serbisyo sa Tao, Hayop, at Komunidad

Isang makabuluhang araw ang idinaos ng JCI Rosales Padyak matapos matagumpay na maisakatuparan ang tatlong makabuluhang proyekto nang sabay-sabay, bilang patunay ng kanilang dedikasyon sa paglilingkod at pagpapalakas ng komunidad.

“Medical Mission sa Barangay” – Isinagawa sa Brgy. Rabago, Rosales, Pangasinan katuwang ang Conrado F. Estrella Regional Medical and Trauma Center at Rosales Ilocano One Alliance. Naghandog ito ng libreng medikal at dental check-up, laboratory tests, gamot, at pati na rin PhilHealth registration upang matiyak na may madaling akses sa serbisyong pangkalusugan ang mamamayan.

“Project SMITH: Pet Adoption Drive” – Naganap sa SM City Urdaneta Central sa pakikipagtulungan ng Luca’s Sanctuary & Cawa’s Gang at SM City Urdaneta Central. Layunin ng proyektong ito na isulong ang kapakanan ng mga hayop sa pamamagitan ng responsableng pag-aampon at pagbibigay ng kaalaman hinggil sa kahalagahan ng pagkakaroon ng ligtas at mapagmahal na tahanan para sa mga inilikas na alaga.

“BUNdles of Love” – Idinaos naman sa Balungao District Jail at Tayug District Jail, kung saan namahagi ng masustansiyang kamote-based buns para sa mga Persons Deprived of Liberty (PDLs). Bukod sa pagbibigay ng nutrisyon, hatid din ng proyektong ito ang malasakit at moral na suporta sa mga nasa loob ng kulungan.

Sa pamamagitan ng mga programang ito, ipinakita ng JCI Rosales Padyak na sa iisang araw, maaaring magdulot ng tatlong ulit na epekto para sa kalusugan, kapakanan ng hayop, at malasakit sa kapwa.

Source: JCI Rosales Padyak