150 Volunteers, sama-samang lininisan ang Badoc Island sa Ilocos Norte
Isang makabuluhang araw ng pagkakaisa at malasakit sa kalikasan ang naganap nong ika-13 ng Oktubre 2025 sa Badoc Island, matapos magtipon ang 150 volunteers mula sa iba’t ibang sektor at organisasyon para sa isang malawakang shoreline cleanup drive.
Sa pangunguna ni Coach Ehra Beli at ng ILOCOSIRENA Freediving Community, matagumpay na naisakatuparan ang inisyatibang naglalayong itaas ang kamalayan ng publiko hinggil sa pangangalaga sa karagatan at tamang pamamahala ng basura sa mga baybayin.
Ang mga kalahok ay nagsagawa ng malawakang paglilinis sa paligid ng isla—nangolekta ng basura, naghiwalay ng recyclable materials, at nagsagawa ng environmental awareness activities para sa mga residente at kabataang kalahok.
Ayon kay Coach Ehra Beli, “Ang Badoc Island ay hindi lang isang destinasyon para sa mga maninisid, kundi isang simbolo ng pag-asa at pagkilos. Kapag nagkaisa ang komunidad, may tunay na pagbabago.”
Bukod sa paglilinis, binigyang-diin din ng grupo ang kahalagahan ng sustainable tourism at responsableng pamumuhay upang mapanatili ang kagandahan at kalusugan ng mga dagat ng Ilocos Norte.
Ang aktibidad ay isinagawa sa ilalim ng temang “Isang Komunidad, Isang Layunin: Malinis na Karagatan para sa Kinabukasan”, bilang patunay na ang kolektibong pagkilos ng mga mamamayan ay kayang magdulot ng positibong pagbabago sa kapaligiran.
Tunay na kahanga-hanga ang ipinakitang malasakit at bayanihan ng mga volunteer—isang paalala na ang bawat maliit na hakbang ay hakbang tungo sa mas malinis, mas luntiang kinabukasan.
Source: FCOA Pagkilatan HQ Freedivers
