2nd Abra PMFC at public health workers, nagkaisa para sa anti-dengue drive sa Tuba

Aktibong nakiisa ang Philippine National Police (PNP) sa mga inisyatiba kontra dengue matapos makipagtulungan ang R-PSB Team sa mga opisyal ng barangay, Municipal Health Workers, at Barangay Health Workers noong Enero 19, 2026 sa Tubo, Abra. Pinagsanib ang lakas ng kapulisan at ng komunidad sa pangangalap ng mga lamok at larvae mula sa iba’t ibang lugar bilang bahagi ng dengue surveillance, kasabay ng pagbibigay ng seguridad upang matiyak ang maayos at ligtas na operasyon.

Ang dengue surveillance ay pinangunahan ng Provincial Health Office sa pamumuno nina Disease Surveillance Officer Leila Bernal at Dr. Marlon Valera (DMO IV), katuwang ang Tubo Municipal Health Office sa ilalim ni Dr. Jordan Dongga-as. Sa tulong ng PNP, naging organisado at ligtas ang pagsasagawa ng mga health-related field activities na mahalaga sa maagap na pagtukoy at pag-iwas sa pagkalat ng dengue.

Binigyang-diin ng PNP na ang kanilang papel ay hindi lamang nakatuon sa pagpapanatili ng kapayapaan at kaayusan, kundi pati na rin sa aktibong pagsuporta sa mga programang pangkalusugan na direktang nakaaapekto sa kaligtasan at kapakanan ng mamamayan. Ang presensya ng kapulisan ay nagsilbing dagdag na proteksyon at suporta sa mga health worker na nasa first line of defense kontra dengue.

Ipinapakita ng naturang inisyatiba ang matibay na ugnayan ng PNP at ng komunidad, kung saan ang kooperasyon at bayanihan ay susi sa epektibong pagtugon sa mga hamong pangkalusugan. Tiniyak ng PNP na magpapatuloy ang kanilang pakikipag-ugnayan sa mga lokal na pamahalaan at ahensya upang isulong ang ligtas, malusog, at maayos na pamayanan.

Source: Second Abra PMFC