Outreach Program at Feeding Activity, isinagawa sa Home for the Aged sa Sorsogon City

Bilang bahagi ng pagdiriwang ng 31st Police Community Relations (PCR) Month, nagsagawa ang PSFTP Class 2026-01 “Balagsik” Team Sorsogon, katuwang ang mga personnel ng Sorsogon City Police Station, ng isang Outreach Program at Feeding Activity noong Hulyo 9, 2026 para sa mga residente ng Home for the Aged sa Brgy. San Juan Roro, Sorsogon City.

Layunin ng aktibidad na maipadama sa ating mga nakatatanda ang pagmamahal, paggalang, at malasakit ng kapulisan at komunidad, kasabay ng pagpapalakas ng ugnayan sa pamamagitan ng makabuluhang serbisyo at pakikipagkapwa.

Sa programa, nagbigay ng mensahe si PMSG Verly E. Perez, PCAD PNCO ng Sorsogon City Police Station, kung saan binigyang-diin niya ang kahalagahan ng patuloy na pag-aaruga at paggalang sa ating mga senior citizen. Ipinaalala rin niya na ang mga simpleng kilos ng kabutihan—tulad ng pagbisita, pakikinig, at pagbibigay ng oras—ay may malaking epekto sa kanilang kaligayahan at nagbibigay sa kanila ng pag-asang hindi sila nalilimutan ng lipunan.

Bukod sa feeding activity, namahagi rin ang mga pulis at mga kalahok ng mga pagkain at iba pang tulong sa mga residente ng pasilidad. Higit pa sa mga materyal na ayuda, ang pinakabuod ng programa ay ang pagbabahagi ng oras, pakikipagkuwentuhan, at pagpaparamdam ng malasakit sa ating mga lolo at lola. Ang kanilang mga ngiti, pasasalamat, at mainit na pagtanggap ay nagsilbing inspirasyon sa bawat kalahok upang higit pang paigtingin ang mga gawaing nagtataguyod ng pagmamalasakit sa komunidad.

Ang gawaing ito ay sumasalamin sa tunay na diwa ng Police Community Relations, kung saan ang kapulisan ay hindi lamang tagapagpatupad ng batas kundi aktibong katuwang ng mamamayan sa pagpapalaganap ng kabutihan, pagkakaisa, at malasakit sa kapwa. Sa pamamagitan ng mga ganitong programa, mas tumitibay ang tiwala at ugnayan sa pagitan ng pulisya at ng komunidad tungo sa isang ligtas, mapayapa, at mapagmalasakit na lipunan.

Nawa’y magsilbing inspirasyon ang gawaing ito upang higit pang mahikayat ang bawat isa na magbahagi ng oras, pagmamahal, at malasakit sa ating mga nakatatanda—mga haliging naging bahagi ng paghubog ng ating mga pamilya at komunidad.