DILG Siquijor, pinatatag ang kakayahan ng mga Barangay Tanod para sa ligtas na mga school zone
Pinatatatag ng Department of the Interior and Local Government (DILG) Siquijor Provincial Office, katuwang ang Provincial Government ng Siquijor, ang kakayahan at kahandaan ng mga barangay tanod sa lalawigan sa pamamagitan ng isinagawang Barangay Tanod Skills Enhancement and Safer School Zone Orientation sa Siquijor State College Convention Hall noong Setyembre 22, 2026, na dinaluhan ng 134 Chief Tanods mula sa iba’t ibang barangay sa lalawigan.
Layunin ng aktibidad na mapahusay ang kaalaman, kasanayan, at kahandaan ng mga barangay tanod sa pagtulong sa pagpapanatili ng kaayusan at kaligtasan sa mga lugar na malapit sa mga paaralan. Binigyang-diin din dito ang kahalagahan ng kanilang papel sa visibility, pagmamasid, traffic assistance, crowd management, wastong pag-uulat, at agarang koordinasyon sa mga kinauukulang ahensya, alinsunod sa itinakdang saklaw ng kanilang mga tungkulin at responsibilidad.
Binigyang-diin ni Provincial Director Dennis S. Quiñones, CESO V na ang kaligtasan sa mga paaralan ay nangangailangan ng sama-samang pagkilos ng school personnel, barangay, law enforcement agencies, at buong komunidad. Tinalakay naman ni LGOO V Jasten Aires Ledesma ng DILG Negros Island Region ang mga tungkulin at responsibilidad ng barangay tanod at ang kanilang mahalagang papel sa pagpapatupad ng Safer School Zone initiative.
Nagbahagi rin ng kaalaman ang mga kinatawan ng Siquijor Police Provincial Office hinggil sa traffic assistance, crowd management, at visibility operations sa school zones, habang tinalakay naman ng mga kinatawan ng Schools Division Office of Siquijor ang mga usapin kaugnay ng school security at epektibong koordinasyon sa pagitan ng mga paaralan at barangay tanod.
Bilang bahagi ng pagsasanay, isinagawa ang mga situational exercises na nakatuon sa wastong pagtugon sa mga karaniwang insidente sa school zones. Nagbigay rin ng feedback ang mga kinatawan mula sa DILG, PNP, at DepEd upang higit na mapaunlad ang kakayahan ng mga kalahok sa tamang pagresponde, pag-uulat, at inter-agency coordination.
Sa pamamagitan ng naturang inisyatiba, layunin ng DILG at mga katuwang na ahensya na magkaroon ng mas maalam, alerto, at handang barangay tanod na makatutulong sa pagpapanatili ng ligtas at maayos na kapaligiran para sa mga mag-aaral, guro, at iba pang miyembro ng komunidad. Pinagtitibay rin nito ang ugnayan ng barangay, paaralan, PNP, at lokal na pamahalaan tungo sa mas ligtas na school communities sa buong lalawigan ng Siquijor.
