CURMA, Pinangunahan ang International Coastal Clean-Up 2025 sa San Juan, La Union

Pinangunahan ng Coastal Underwater Resource Management Actions (CURMA) ang taunang International Coastal Clean-Up (ICC) na isinagawa sa Waves Point (Mebuyan Vessel), Urbiztondo, San Juan, La Union noong Setyembre 20, 2025. Dinaluhan ito ng iba’t ibang paaralan, organisasyon, at mga boluntaryo na nagkaisa upang isulong ang adbokasiya ng paglilinis at pangangalaga sa karagatan.

Isa sa mga aktibong lumahok ang San Juan Senior High School–Stand Alone, kasama ang kanilang mga organisasyon tulad ng Supreme Secondary Learner Government (SSLG), Youth for Environment in Schools Organization (YES-O), RSAG, PEER Facilitators Club (PFC), WinS, at Red Cross Youth (RCY). Ang kanilang pagtutulungan ay nagpamalas ng mahalagang ambag ng kabataan sa laban kontra polusyon sa dagat.

Bukod sa pagtanggal ng mga basura sa baybayin, isinagawa rin ang maayos na paghihiwalay at pagtatapon ng mga nakolekta, na nagsilbing paalala sa kahalagahan ng wastong pamamahala ng basura. Higit pa rito, ang aktibidad ay nagbunga ng disiplina, pagkakaisa, at kamalayang pangkalikasan sa mga dumalo.

Muli, ipinakita ng CURMA ang kanilang pamumuno at malasakit sa kalikasan, na nagsilbing inspirasyon hindi lamang sa mga kabataan kundi sa buong komunidad upang magtulungan sa mas malawak na misyon—ang pangangalaga at pagliligtas sa ating mga karagatan at planeta.

Source: SJSHS-SA PEER FACILITATORS CLUB