ISPSC, pinangunahan ang Coastal Clean-up bilang paggunita sa 125 Taon ng Civil Service

Sa pagdiriwang ng 125th Philippine Civil Service Anniversary, pinangunahan ng Ilocos Sur Polytechnic State College (ISPSC) ang isang makabuluhang aktibidad na binubuo ng Fun Walk at Coastal Clean-up sa baybayin ng Barangay Darapidap nito lamang ika-1 ng Oktubre, 2025.

Dumalo at nakiisa sa gawain ang mga guro, kawani, at mag-aaral ng ISPSC, kasama ang mga kasapi ng PNP Candon City at mga opisyal ng Barangay Darapidap. Ang pagtutulungan ng mga sektor ay nagbigay-diin sa kahalagahan ng kolektibong aksyon para sa pangangalaga ng kalikasan at pagpapalakas ng ugnayan sa komunidad.

Ayon sa pamunuan ng ISPSC, ang aktibidad ay hindi lamang bahagi ng selebrasyon kundi isang kongkretong hakbang upang isulong ang adbokasiya sa kalinisan at kaayusan ng kapaligiran. Binigyang-diin din ng mga kalahok na ang ganitong proyekto ay sumasalamin sa tunay na diwa ng malasakit, serbisyo, at bayanihan—mga halagang pinangangalagaan ng Philippine Civil Service sa loob ng 125 taon.

Sa pagtatapos ng programa, nag-iwan ng mensahe ang mga organizers na ipagpatuloy ang sama-samang pagkilos para mapanatili ang kalinisan at kagandahan ng mga pamayanan, lalo na sa harap ng mga hamon sa kapaligiran at pagbabago ng klima.

Source: ISPSC