Ika-128 Araw ng Kalayaan, ipinagdiwang sa pamamagitan ng Tree Planting Activity sa Benguet
Bilang bahagi ng pagdiriwang ng ika-128 Araw ng Kalayaan ng Pilipinas, matagumpay na nagsagawa ng Tree Planting Activity ang Municipal Environment and Natural Resources Office (MENRO) ng Tublay, Benguet noong Hunyo 12, 2026 sa Anjapat, Ambongdolan, Tublay, sa ilalim ng temang “Reforestation and Watershed Management Program.” Nakiisa sa makabuluhang gawain ang mga tauhan ng Tublay Municipal Police Station (MPS), katuwang ang iba’t ibang sektor ng pamayanan sa pagsusulong ng pangangalaga sa kalikasan.
Dumalo rin sa aktibidad ang mga mag-aaral ng Benguet State University (BSU), mga kawani ng Local Government Unit (LGU) ng Tublay, at mga opisyal ng Barangay Ambongdolan. Ipinakita ng kanilang sama-samang pagkilos ang kahalagahan ng matibay na ugnayan sa pagitan ng kapulisan, pamahalaan, at komunidad sa pagpapatupad ng mga programang may positibong epekto sa mamamayan at sa kapaligiran.
Sa pamamagitan ng kolektibong pagsisikap ng mga kalahok, humigit-kumulang 180 punla ng iba’t ibang uri ng puno ang naitanim. Inaasahang makatutulong ang mga ito sa pangangalaga ng watershed, pagpapanumbalik ng likas na yaman, at pagpapalawak ng mga luntiang espasyo na mahalaga sa pagpapanatili ng balanseng ekosistema at ligtas na kapaligiran para sa susunod na mga henerasyon.
Muling pinatunayan ng aktibidad na ang epektibong community policing ay hindi lamang nakatuon sa pagpapanatili ng kapayapaan at kaayusan, kundi maging sa aktibong pakikilahok sa mga programang pangkaunlaran at pangkalikasan.
Source: PNP Tublay MPS
