PRO5 at mga katuwang na ahensya, nagkaisa para sa bagong simula ng mga dating rebelde sa Sorsogon
Bilang bahagi ng pagsusulong ng pangmatagalang kapayapaan at pagbibigay ng pagkakataong makapagsimula muli, tumanggap ng Cash Relief Assistance ang mga dating rebelde sa lalawigan ng Sorsogon sa pamamagitan ng programang naglalayong tulungan silang makapagtayo muli ng maayos na buhay kasama ang kanilang pamilya at komunidad. Isinagawa ang aktibidad sa Provincial Gymnasium, Capitol Compound, Sorsogon City noong Oktubre 19, 2026, sa pangunguna ng Talino at Galing ng Pilipino (TGP) Party-List sa pamamagitan ng C.A.R.E. Program, katuwang ang Department of Social Welfare and Development (DSWD) at Sorsogon Police Provincial Office (SORPPO), sa suporta ng lokal na pamahalaan.
Nagbigay ng mensahe ng suporta sina PLtCol Christopher Aduviso, Deputy Provincial Director for Operations ng SORPPO; Maria Criselda Despi-Goingo, RSW, PGADH, Acting Provincial Social Welfare and Development Officer; Isoceles Marasagan, National Director of Social Services ng TGP Party-List; at Romeo Asuncion, Political Affairs Officer ng TGP Party-List. Binigyang-diin nila ang kahalagahan ng pagtutulungan ng pamahalaan at mga katuwang na sektor upang matugunan ang pangangailangan ng mga dating rebelde, masuportahan ang kanilang pagbabalik sa lipunan, at mabigyan sila ng pagkakataong mamuhay nang mapayapa, marangal, at produktibo.
Higit pa sa tulong pinansyal, ipinapakita ng inisyatibong ito na ang pagkamit ng kapayapaan ay nangangailangan ng malasakit, inklusibong serbisyo, at pagbubukas ng mga oportunidad para sa mga indibidwal na nagnanais talikuran ang armadong pakikibaka. Kaakibat ng PNP Focused Agenda at Executive Order No. 70, isinusulong ng kapulisan at mga katuwang na ahensya ang whole-of-nation approach upang matugunan ang mga ugat ng insurhensiya at mapalakas ang reintegrasyon ng mga dating rebelde sa kanilang mga komunidad. Sa ilalim ng Project Alagang KA-SU-ROG, patuloy na pinagtitibay ang ugnayan ng mga ahensya at mamamayan tungo sa mas ligtas at maunlad na lipunan.
Sa pamumuno ni PBGen Randy Glenn G Silvio, Regional Director ng Police Regional Office 5 (PRO5), patuloy na sinusuportahan ng kapulisan ang mga programang nagbibigay ng pag-asa at bagong direksiyon sa buhay ng mga mamamayan. Ipinapakita ng inisyatibong ito na ang tunay na kapayapaan ay hindi lamang nakasalalay sa seguridad, kundi maging sa pagbibigay ng pagkakataong makapagsimula muli at makibahagi sa pag-unlad ng komunidad. Sa pamamagitan ng pagkakaisa, malasakit, at tuloy-tuloy na suporta, patuloy na isinusulong ng PRO5 ang isang mapayapa at maunlad na Bicol, alinsunod sa adhikain ng Bagong PNP para sa Bagong Pilipinas: Serbisyong Mabilis, Tapat, at Nararamdaman.
Source: https://www.facebook.com/share/p/1DUoRHmsqb/
Sa panulat ni: PCpl Doxie Charesse C Casasos
