Mas pinalakas na ugnayan sa komunidad, hatid ng Tublay MPS at mga lokal na ahensya
Nagkaisa ang Tublay Municipal Police Station (MPS), sa pamumuno ni PCpt Angeline T. Dongpaen, OIC, katuwang ang Municipal Social Welfare and Development (MSWD) at Tublay Women’s Association, sa matagumpay na pagsasagawa ng community visitations sa Barangay Ambongdolan at Barangay Tuel sa Tublay, Benuet kamakailan. Isinagawa ang aktibidad bilang bahagi ng IMPLAN DIKIG o OPLAN TAGAPAGPATUPAD na naglalayong palakasin ang ugnayan ng pulisya at komunidad.
Layunin ng nasabing inisyatibo na maabot ang mga pamilya sa komunidad at mapataas ang kamalayan hinggil sa Republic Act No. 9262 at Republic Act No. 7610. Binigyang-diin sa mga talakayan ang kahalagahan ng pagprotekta sa kababaihan at mga bata laban sa anumang uri ng pang-aabuso at karahasan.
Nakibahagi rin ang mga kinatawan ng MSWD sa pagbibigay ng impormasyon ukol sa mga serbisyong panlipunan at mga programang maaaring mapakinabangan ng mga pamilyang nangangailangan. Bahagi rin ng aktibidad ang pamamahagi ng food packs bilang agarang tulong sa mga napiling benepisyaryo, kasabay ng pag-aalay ng panalangin upang magbigay ng lakas ng loob at pag-asa sa bawat pamilya.
Ipinapakita ng gawaing ito ang patuloy na pagtutulungan ng PNP at mga lokal na ahensya sa Tublay upang mapalakas ang ugnayan sa komunidad, mapalawak ang kaalaman ng mamamayan, at maihatid ang komprehensibong suporta sa mga pamilyang nasa laylayan ng lipunan.
Source: WCPD Tublay MPS Facebook page
