Cagayan PPO, nagsagawa ng community outreach program sa Sinicking Elementary School
Pinangunahan ni PCOL Mardito G. Anguluan, Provincial Director ng Cagayan Police Provincial Office (CPPO), ang outreach program ng 1st Provincial Mobile Force Company (PMFC) sa pakikipagtulungan sa lokal na pamahalaan ng Rizal sa Sinicking Elementary School, Barangay Sinicking, Rizal, Cagayan noong Oktubre 21, 2026. Tampok sa aktibidad ang Project ASSIST at Project SKUL-CARE, kung saan namahagi ng mga aklat, school supplies, at hygiene kits sa mga mag-aaral.
Sa kanyang mensahe, binigyang-diin ni PCOL Anguluan ang kahalagahan ng edukasyon bilang pundasyon ng magandang kinabukasan. Hinikayat niya ang mga mag-aaral na magsikap sa pag-aaral at pahalagahan ang mga kagamitang ipinagkaloob sa kanila. Binigyang-diin din niya ang patuloy na suporta ng PNP sa mga programang nagtataguyod sa kapakanan ng kabataan.
Nakiisa rin sa aktibidad si Rizal Mayor Jamila Denise B. Ruma, kasama ang mga kinatawan ng pulisya, lokal na pamahalaan, at paaralan. Patuloy namang pinagtitibay ng 1st PMFC at CPPO ang pakikipagtulungan sa mga lokal na pamahalaan at paaralan upang suportahan ang edukasyon at kapakanan ng kabataan at palakasin ang ugnayan ng pulisya at komunidad.
