Agarang aksyon, ipinamalas ng mga awtoridad sa Tabaco City, Albay
Isang kahanga-hangang halimbawa ng malasakit at kahandaan ang ipinamalas ng mga tauhan ng mga awtoridad sa Tabaco City matapos agad ang mga itong rumesponde sa isang emergency na kinasasangkutan ng pasyenteng may karamdaman sa paghinga ngayong gabi ng Abril 12, 2026.
Bandang alas-8 ng gabi, nakatanggap ng tawag ang duty seaport police mula sa isang concerned citizen hinggil sa isang pasyente na may breathing disorder na sakay ng bangkang paparating mula sa San Miguel Island, Tabaco City. Kaagad namang kumilos sina PMSg Jeffrey Cortez at PSSg Johnny Cruzana sa ilalim ng pamumuno ni PLTCOL VIRGIL B BIBAT, hepe ng Tabaco City Police Station, upang matiyak ang kaligtasan ng pasyente.
Sa mabilis na koordinasyon, agad nilang ipinaabot ang impormasyon sa himpilan sa pamamagitan ng duty TOC, at humingi ng tulong sa City Disaster Risk Reduction and Management Office (CDRRMO) para sa agarang pagpapadala ng ambulansya.
Pagdating ng bangka sa pantalan, walang pag-aatubiling binuhat ni PMSg Cortez ang pasyente at mabilis itong inihatid sa naghihintay na ambulansya ng CDRRMO. Sa tulong ng maagap na aksyon ng mga pulis at ng rescue team, agad na naipadala ang pasyente sa pinakamalapit na pagamutan para sa kinakailangang medikal na atensyon.
Ang insidenteng ito ay patunay ng dedikasyon at tunay na serbisyo publiko ng Tabaco CPS at ng mga tauhan ng CDRRMO sa pagbibigay ng agarang tulong sa oras ng pangangailangan. Ipinapakita rin nito ang kahalagahan ng koordinasyon sa pagitan ng kapulisan at iba pang ahensya sa pagsagip ng buhay.
Patuloy ang paalala ng mga awtoridad sa publiko na huwag mag-atubiling makipag-ugnayan sa kanila sa oras ng emerhensya, sapagkat ang bawat segundo ay mahalaga sa pagligtas ng buhay.
