La Union PPO at komunidad, nagkaisa sa BARKADA Project para sa mas malinis at ligtas na pamayanan
Ipinakita ng La Union Police Provincial Office (LUPPO) ang mas pinatibay na ugnayan ng pulisya at komunidad matapos makiisa sa Barangay at Kalinisan Day (BARKADA) Project na isinagawa sa Barangay Cacapian, San Juan, La Union nitong Abril 16. Bahagi ang aktibidad ng patuloy na adbokasiya ng Philippine National Police (PNP) na palakasin ang community engagement at pagtutulungan para sa mas maayos na kapaligiran.
Pinangunahan ng Provincial Community Affairs and Development Unit (PCADU) ang partisipasyon ng PNP sa ilalim ng pamumuno ni PCpt Vivina E. Tanacio, Asst. UC ng PCADU, sa pangangasiwa ni PLtCol Lawrence L. Gañuelas. Nakibahagi rin sa inisyatiba ang iba’t ibang ahensya ng pamahalaan bilang patunay ng mas pinagtibay na inter-agency cooperation.
Dumalo at aktibong nakilahok sa clean-up drive ang mga opisyal ng Barangay Cacapian, San Juan BFP, Philippine Coast Guard, at iba pang katuwang na ahensya. Sama-sama nilang isinulong ang layunin ng programa na linisin ang komunidad at itaguyod ang disiplina at responsibilidad sa kapaligiran.
Ayon sa La Union PPO, ang BARKADA Project ay bahagi ng “Bagong Bayanihan” na naglalayong hikayatin ang regular na paglilinis, tamang pamamahala ng basura, at aktibong partisipasyon ng bawat mamamayan. Sa pamamagitan nito, mas pinagtitibay ang ugnayan ng pulisya at komunidad tungo sa ligtas, malinis, at mas maunlad na pamumuhay para sa lahat.
Source: La Union PPO
