Siyam na indibidwal, Nahuling lumabag sa Oplan Galugad ng PNP San Pedro Component City Police Station
Siyam na indibidwal ang nahuli dahil sa paglabag sa mga local na ordinansa sa isinagawang Oplan Galugad ng mga tauhan ng San Pedro Component City Police Station (CCPS) sa Barangay Estrella noong Hunyo 18, 2026.
Ang operasyon, na isinagawa mula alas-10:00 ng gabi hanggang alas-12:00 ng hatinggabi, ay pinangunahan ni PLT Anthony De Pedro sa ilalim ng pangangasiwa ni PLTCOL Reynaldo N. Vitto, Acting Chief of Police, katuwang ang mga opisyal ng barangay at mga miyembro ng Barangay Peacekeeping Action Team (BPAT). Layunin nitong paigtingin ang mga hakbang sa seguridad, palakasin ang police visibility, at maiwasan ang mga gawaing kriminal sa komunidad bilang suporta sa programang “Safer Cities” ng Kalihim ng Department of the Interior and Local Government (DILG).
Sa siyam na nahuli, may mga lumabag sa pagbabawal sa pag-inom ng alak sa pampublikong lugar at sa umiiral na curfew ordinance. Binigyan sila ng kaukulang babala at pinaalalahanang mahigpit na sumunod sa mga umiiral na batas at ordinansa. Muling iginiit ng San Pedro CCPS ang kanilang pangako na mapanatili ang kapayapaan at kaayusan sa pamamagitan ng maagap na pagpapatupad ng batas, tuloy-tuloy na pagpapatrolya, at pakikipagtulungan sa mga stakeholder ng komunidad.
