Pagkakaisa ng pulis at komunidad, tampok sa matagumpay na Women’s Month Activity sa Abulug

Ipinamalas ng Philippine National Police (PNP) ang matibay na ugnayan nito sa komunidad matapos ang matagumpay na pagsasagawa ng feeding program bilang bahagi ng pagdiriwang ng National Women’s Month 2026 sa bayan ng Abulug.

Pinangunahan ng Abulug Police Station, katuwang ang Municipal Advisory Group (MAG), Local Government Unit (LGU), Municipal Social Welfare and Development (MSWD), at Kabataan Kontra Droga at Terorismo (KKDAT), ang nasabing aktibidad na ginanap noong Marso 21, 2026 sa Purok Sawang, Barangay Siguiran. Layunin nitong maghatid ng tulong at saya sa mga batang benepisyaryo sa komunidad.

Naging sentro ng programa ang pagbibigay ng masustansyang pagkain sa mga kabataan, na sinabayan ng iba’t ibang aktibidad na naglalayong palakasin ang kamalayan sa kalusugan at kapakanan ng mga bata. Ayon sa PNP, mahalaga ang ganitong inisyatibo upang mapalalim ang tiwala at kooperasyon ng publiko sa kapulisan.

Malaki ang naging ambag ng mga boluntaryong sina Ginang Beverly Laungayan, Ginang Elynor Membrot, Ginang Edna Yadao, Ginang Geraldine Sangao, at Ginoong Rey Acosta, na naglaan ng kanilang oras at pagsisikap upang maisakatuparan ang programa. Ipinakita ng kanilang pakikiisa ang tunay na diwa ng bayanihan sa komunidad.

Bukod sa feeding program, naghatid din ng mensahe si Pastora Rubilyn Aguna na nagbigay inspirasyon at pag-asa sa mga dumalo. Samantala, nagbigay naman ng mahalagang kaalaman si PSSg Baby Lyne B. Toon hinggil sa Republic Act 9262 o Anti-Violence Against Women and Their Children Act, at Republic Act 7610 o Special Protection of Children Against Abuse, Exploitation and Discrimination Act.

Dagdag pa rito, tinalakay ni PSSg Zarra Jane Bielza ang konsepto ng “good touch and bad touch,” bilang bahagi ng kampanya ng PNP sa pagpapalakas ng child protection awareness at pag-iwas sa anumang uri ng pang-aabuso sa mga kabataan.

Ang tagumpay ng aktibidad ay patunay na sa pamamagitan ng pagkakaisa at pagtutulungan ng kapulisan, pamahalaan, at mamamayan, mas nagiging epektibo ang pagpapatupad ng mga programang naglalayong protektahan at itaguyod ang kapakanan ng kababaihan at kabataan sa komunidad.

Source: Abulug PS Valley Cops