KKDAT Santiago City Chapter, nakilahok sa I-Run for Youth Center sa Ilagan, Isabela

Matagumpay na isinagawa ang I-Run for Youth Center, isang 5K Fun Run at Rave Party na dinaluhan ng libo-libong kabataan kabilang na ang mga miyembro ng Kabataan Kontra Droga at Terorismo (KKDAT) Santiago City Chapter na nagtagisan sa kalsadang puno ng sigla at saya noong Enero 24, 2024 na ginanap sa Ilagan City, Isabela. Ang aktibidad ay nagbigay-daan hindi lamang sa makabuluhan at masayang fun run kundi pati na rin sa isang nakaka-aliw na Rave Party na nagbigay kulay at saya sa kanilang gabi.

Sa likod ng mga pampasigla at makulay na ilaw, nagsama-sama ang mga mamamayan para sa isang makabuluhang layunin. Kaugnay ng aktibidad na ito, ang mga organizer ay nakalikom ng malaking halaga na agad namang isinasantabi para sa Isabela Youth Center.

Ang nasabing sentro ay magiging pangunahing lugar para sa mga proyektong pangkabataan at pag-unlad sa Isabela. Sa likas na pagkakaisa ng komunidad at malasakit para sa kabataan, napatunayan ng I-Run for Youth Center na hindi lamang ito isang pagsasanay kundi isang malaking hakbang patungo sa mas magandang kinabukasan para sa kabataan ng Isabela.

Layunin ng I-Run for Youth Center na magbigay hindi lamang ng kasiyahan kundi pati na rin ng pangunahing suporta sa Isabela Youth Center. Sa pamamagitan ng pagtakbo at pagsasama-sama ng komunidad, layon nitong makalikom ng pondo upang matulungan ang pag-unlad at mga proyekto para sa kabataan sa buong lalawigan. Isinusulong nito ang pagkakaroon ng mas matatag at sentralisadong basehan para sa kilos-kabataan at pangangailangan ng mga kabataan sa Isabela.

Source: KKDAT City of Santiago