HPG, nagsagawa ng anti-bullying at road safety campaign sa Nueva Ecija bilang bahagi ng ika-31 Police Community Relations Month
Nakiisa ang Philippine National Police-Highway Patrol Group (PNP-HPG) sa pagdiriwang ng ika-31 Police Community Relations (PCR) Month sa pamamagitan ng isang community outreach activity na isinagawa sa Rio Chico Elementary School sa Barangay Rio Chico, General Tinio, Nueva Ecija noong Hulyo 17.
Sa ilalim ng pamumuno ni PBGEN Rommel S. Batangan, Director ng HPG, isinagawa ang aktibidad na may temang “Sa Bagong Pilipinas, Ugnayang Pulis at Mamamayan: Tapat, Maasahan, at Nararamdaman ng Bayan,” na naglalayong palakasin ang ugnayan ng kapulisan at komunidad sa pamamagitan ng pagpapalaganap ng kamalayan laban sa pambu-bully at pagtataguyod ng kaligtasan sa kalsada sa mga mag-aaral.
Sa kanyang mensahe, hinimok ni Batangan ang mga mag-aaral na ugaliing sundin ang mga tuntunin sa kaligtasan sa kalsada, kabilang ang tamang paggamit ng pedestrian lane, pagtingin sa kaliwa at kanan bago tumawid, at pagsunod sa mga traffic signs at tagubilin ng mga pulis upang makaiwas sa aksidente. Binigyang-diin din niya ang kahalagahan ng paggalang at kabutihan sa kapwa, at iginiit na walang puwang ang pambu-bully sa paaralan sapagkat ang tunay na katapangan ay nasusukat sa paggalang at pagtulong sa iba.
Sa pamamagitan ng mga talakayan at iba pang gawaing pang-edukasyon, hinikayat ng mga tauhan ng HPG ang mga mag-aaral na isabuhay ang paggalang, disiplina, responsibilidad, at kabutihang-asal, habang pinagtitibay ang kanilang kaalaman sa tamang pag-uugali sa lansangan at pagsunod sa mga batas-trapiko.
Ayon sa HPG, patuloy itong magsasagawa ng mga programang nagpapalakas sa ugnayan ng pulisya at komunidad upang maisulong ang kaligtasan ng publiko, maitanim ang mabubuting pagpapahalaga sa kabataan, at mapatatag ang tiwala ng mamamayan sa kapulisan.
